महामेट्रो व महाराष्ट्र रिक्षा पंचायत यांच्या विद्यमाने ‘मेट्रो फीडर रिक्षा सेवे’चे उद्घाटन!

महापौर रवी लांडगे यांच्या शुभहस्ते पीसीएमसी मेट्रो स्टेशनवर ‘मेट्रो फीडर रिक्षा सेवा
पिंपरी : पिंपरी-चिंचवड शहरातील सार्वजनिक वाहतूक व्यवस्था अधिक वेगवान, सुलभ, सुरक्षित व नागरिकाभिमुख करण्याच्या उद्दिष्टाने आज एक महत्त्वपूर्ण अधिकृत पाऊल उचलण्यात आले. पिंपरी-चिंचवड महानगरपालिका, पुणे महामेट्रो व महाराष्ट्र रिक्षा पंचायत यांच्या संयुक्त सहकार्याने प्रवासी हितासाठी ‘मेट्रो फीडर रिक्षा सेवा’चा अधिकृत उद्घाटन सोहळा सोमवार १७ ऑगस्ट रोजी पिंपरी-चिंचवड महानगरपालिकेच्या पीसीएमसी मेट्रो स्टेशन येथे संपन्न झाला.

या सेवेचा शुभारंभ पिंपरी-चिंचवडचे महापौर रवी लांडगे यांच्या शुभहस्ते झाला. याप्रसंगी आमदार उमाताई खापरे, उपमहापौर सौ. शर्मिलाताई बाबर, महामेट्रोचे व्यवस्थापकीय संचालक श्रावण हर्डीकर, महापालिका आयुक्त डॉ. विजय सूर्यवंशी, महाराष्ट्र रिक्षा पंचायतचे संस्थापक अध्यक्ष डॉ. बाबा कांबळे, भारतीय जनता पक्षाचे पिंपरी-चिंचवड शहर अध्यक्ष व नगरसेवक शत्रुघन बापू काटे, पक्षनेते प्रशांत शितोळे, स्थायी समिती अध्यक्ष अभिषेक बारणे, नगरसेवक तुषार हिंगे, पिंपरी वाहतूक विभाग पोलीस निरीक्षक अमित डोळस, शहर अभियंता मनोज सेठीया तसेच इतर मान्यवर उपस्थित होते.

सेवेचे स्वरूप व मार्ग
मेट्रो प्रवाशांच्या सोयीसाठी ही सेवा “शेअरिंग व मीटर” अशा दोन्ही स्वरूपांत उपलब्ध करून देण्यात आली आहे. खालील मार्ग निर्धारित करण्यात आले आहेत.
गेट क्र. १: घरकुल प्रकल्प, जाधववाडी, कुदळवाडी, चिखली गाव, अजमेरा कॉलनी, केएसबी चौक, मोरवाडी कोर्ट, शाहुनगर.
गेट क्र. २: अंथिया सोसायटी, अजमेरा कॉलनी, मासुळकर कॉलनी, अंतरिक्ष कॉलनी, खराळवाडी, मोनिका अपार्टमेंट, डी. वाय. पाटील कॉलेज.
गेट क्र. ४: पिंपरी गाव, चिंचवडगाव, तापकीर नगर, वाल्हेकर वाडी, निगडी, डीलक्स चौक, काळेवाडी ब्रिज, साई चौक, चाफेकर चौक.

रिक्षा चालकांसाठी अनिवार्य नियमावली
प्रवाशांना दर्जेदार व विनाव्यत्यय सेवा उपलब्ध व्हावी यासाठी खालील कडक नियमावली लागू करण्यात आली आहे. भाडे नाकारण्यास सक्त मनाई (No Refusal Policy):** मेट्रो स्टेशनवर उपस्थित सर्व रिक्षा चालकांनी कोणत्याही प्रवाशाला भाडे नाकारू नये.
उल्लंघनाबाबत कारवाई: नियमांचे उल्लंघन करून प्रवाशांना सेवा नाकारणाऱ्या चालकांवर कायदेशीर तरतुदींनुसार तसेच संघटनेच्या वतीने कठोर कारवाई करण्यात येईल.

डॉ. बाबा कांबळे, संस्थापक अध्यक्ष, महाराष्ट्र रिक्षा पंचायत यांनी या उपक्रमाद्वारे प्रवाशांचा मौल्यवान वेळ वाचणार असून, रिक्षाचालकांना हक्काचा व सन्मानजनक रोजगार उपलब्ध होणार असल्याचे स्पष्ट केले. स्मार्ट व नागरिककेंद्रित पिंपरी-चिंचवड घडविण्यासाठी या उपक्रमाला पिंपरी-चिंचवड महानगरपालिकेची पूर्ण साथ राहील, असेही त्यांनी नमूद केले.