चिखली-कुदळवाडीत पाच धार्मिक स्थळे जमीनदोस्त, नागरिकांमध्ये संतापाची लाट!
चिखली-कुदळवाडी पुन्हा हादरली; रहिवाशांचा न्यायासाठी एल्गार!
पिंपरी : पिंपरी-चिंचवड महानगरपालिकेला ८ जून रोजी धार्मिक स्थळावर कारवाई न करण्यासाठी निवेदन देऊनही अखेर ९ जूनच्या पहाटे सुमारे ३ वाजण्याच्या सुमारास चिखली-कुदळवाडी परिसरात पुन्हा एकदा मोठी अतिक्रमण कारवाई करण्यात आली. या कारवाईत मुस्लिम समाजाशी संबंधित पाच धार्मिक स्थळे पाडण्यात आल्याचा आरोप स्थानिक नागरिकांनी केला असून परिसरात तीव्र संतापाचे वातावरण निर्माण झाले आहे.
कारवाईपूर्वीच अर्शद अस्लम खान आणि स्थानिक रहिवाशांनी महापालिका आयुक्त डॉ. विजय सूर्यवंशी तसेच अतिरिक्त आयुक्त तृप्ती सांडभोर यांना निवेदन देऊन कारवाईत पारदर्शकता ठेवण्याची मागणी केली होती. तसेच कोणत्याही एका समाजाला लक्ष्य करून कारवाई करू नये, अशी स्पष्ट भूमिका मांडण्यात आली होती.
शहरातील अनेक अनधिकृत बांधकामे दंड आकारून नियमित करण्यात आली आहेत. मग चिखली-कुदळवाडीतील रहिवाशांनाही समान न्याय का दिला जात नाही? अनेक वर्षांपासून वास्तव्यास असलेल्या नागरिकांना अद्याप पाणी, मलनिस्सारण यांसारख्या मूलभूत सुविधांपासून वंचित ठेवण्यात आले आहे. त्यातच १० एप्रिल २०२६ रोजी झालेल्या कारवाईत प्रार्थनास्थळे, दुकाने, लघुउद्योग आणि घरे जमीनदोस्त करण्यात आली होती. निवेदन दिल्यानंतर अवघ्या काही तासांतच पुन्हा पहाटेच्या अंधारात कारवाई झाल्याने नागरिकांनी प्रशासनाच्या भूमिकेवर गंभीर प्रश्नचिन्ह उपस्थित केले आहे. “जर सर्वांवर समान कारवाई होत असेल तर केवळ विशिष्ट भाग आणि विशिष्ट समाजाच्या बांधकामांवरच वारंवार बुलडोझर का चालतो?” असा सवाल संतप्त नागरिकांकडून उपस्थित केला जात आहे.
दरम्यान, या कारवाईमुळे चिखली-कुदळवाडी परिसरात भीती, असुरक्षितता आणि संतापाचे वातावरण निर्माण झाले असून नागरिक आता न्यायासाठी पुढील कायदेशीर आणि लोकशाही मार्गाने लढा उभारण्याच्या तयारीत आहेत.
शहरातील अनधिकृत बांधकामांवर कोणतीही तडजोड न करता कठोर कारवाई करणे ही प्रशासनाची जबाबदारी असून अनधिकृत बांधकामे निष्कासित करणे हे शहरातील नियोजित व शाश्वत विकासासाठी आवश्यक आहे. कोणत्याही प्रकारच्या अनधिकृत बांधकामांना प्रशासनाकडून अभय दिले जाणार नाही. नागरिकांनीही बांधकाम करण्यापूर्वी सर्व आवश्यक परवानग्या घेऊनच पुढील कार्यवाही करावी. – डॉ. विजय सूर्यवंशी, आयुक्त, पिंपरी चिंचवड महानगरपालिका
