महावितरण प्रशसनाकडून 291 कोटी रुपयांचा विकासासाठी आराखडा मंजूर!

आमदार महेश लांडगे यांच्या पाठपुराव्याला मोठे यश
पिंपरी : भोसरी विधानसभा मतदारसंघाच्या सर्वांगीण विकासाला मोठी गती देणारा ऐतिहासिक निर्णय घेत महावितरण प्रशासनाने 291.52 कोटींच्या शहर विकास आराखडा योजनेला मंजुरी दिली आहे. त्यासाठी पावर डिस्ट्रीब्यूशन इनहान्समेंट प्रोग्राम अंतर्गत निविदा प्रक्रिया राबवण्यात आली आहे. चिखली– मोशी– चऱ्होली या झपाट्याने विकसित होत असलेल्या ‘रेसिडेन्सीअल कॉरिडोर’ साठी पुढील 10 वर्षांच्या वीज पायाभूत सुविधांना हा प्रकल्प मोठा “बूस्टर डोस” ठरणार आहे.

पिंपरी चिंचवडमध्ये वेगाने वाढणारे निवासी प्रकल्प, नवीन टाउनशिप, आयटी व औद्योगिक विस्तार आणि सातत्याने वाढणारी लोकसंख्या लक्षात घेता भविष्यातील वीज गरजांचा सखोल अभ्यास करून हा विस्तृत DPR तयार करण्यात आला आहे. या योजनेमुळे भोसरी विधानसभा मतदारसंघातील वीज वितरण व्यवस्था अधिक सक्षम, आधुनिक, विश्वासार्ह आणि भविष्योन्मुख होणार आहे.

राज्याचे मुख्यमंत्री देवेंद्र फंडणवीस यांच्या मार्गदर्शनाखाली आमदार महेश लांडगे यांनी महावितरण सुविधा सक्षम करण्यासाठी सातत्याने पाठपुरावा केला आहे. विधानसभा अधिवेशनात केलेला प्रभावी पाठपुरावा आणि नाशिक येथे होणारा कुंभमेळाच्या निमित्ताने महावितरण इन्फ्रास्ट्रक्चर उभारणीला गती मिळालेली आहे.

सध्या भोसरी विभागात 4 लाख 58 हजारांहून अधिक ग्राहक असून, वाढत्या वीज मागणीमुळे विद्यमान यंत्रणेवर मोठा ताण निर्माण होत आहे. अनेक भागांमध्ये ओव्हरलोडिंग, व्होल्टेज फ्लक्चुएशन आणि तांत्रिक अडचणी निर्माण होत असल्याने भविष्यातील गरज ओळखून ही महत्त्वाकांक्षी योजना राबविण्यात येत आहे.

10 नवीन उपकेंद्र..!
या प्रकल्पांतर्गत 10 नवीन उपकेंद्रे, 220 किलोमीटर उच्चदाब वीजवाहिन्या, 150 किलोमीटर लघुदाब वीजवाहिन्या, 100 नवीन रोहित्रे, 128 रोहित्र क्षमता वाढ, 105 RMU, 160 फीडर पिलर तसेच आधुनिक तंत्रज्ञानावर आधारित वीज वितरण सुविधा उभारण्यात येणार आहेत. त्यामुळे चिखली, मोशी, चऱ्होली, दिघी आणि MIDC परिसरातील भविष्यातील वाढती निवासी व औद्योगिक वीज मागणी सक्षमपणे पूर्ण करता येणार आहे. विशेष म्हणजे, या योजनेमुळे नागरिकांना अधिक दर्जेदार, अखंडित आणि विश्वासार्ह वीजपुरवठा उपलब्ध होणार असून वीज खंडित होण्याचे प्रमाण कमी होईल. तांत्रिक बिघाड झाल्यास प्रभावित भाग त्वरित वेगळा करून कमी वेळेत वीजपुरवठा पूर्ववत करता येणार आहे. तसेच Technical Loss आणि AT & C Loss कमी होऊन संपूर्ण वीज वितरण व्यवस्था अधिक कार्यक्षम होणार आहे.

मोशी–चिखली–चऱ्होली परिसरात. हजारो नवीन घरे, टाउनशिप, शैक्षणिक संस्था, हॉस्पिटल्स, व्यावसायिक संकुले आणि उद्योग येथे उभे राहत आहेत. अशा परिस्थितीत पुढील दशकाचा विचार करून उभारण्यात येणारी ही वीज पायाभूत सुविधा भविष्यातील विकासाचा मजबूत पाया ठरणार आहे.