राष्ट्रवादी अजित पवारांच्या पक्ष प्रचारासाठी १५० एलईडी व्हॅन

पक्षाचा संदेश मतदारांपर्यंत पोहोचविणार
मुंबई : अजित पवार यांच्या नेतृत्वाखालील राष्ट्रवादी काँग्रेसने विधानसभा निवडणुकीच्या प्रचाराला आणखी वेग दिला असून, पक्षाचे कर्तृत्व आणि आश्वासने मतदारांपर्यंत पोहोचविण्यासाठी पक्षाने १५० एलईडी व्हॅन मैदानात उतरवल्या आहे. पक्षाचे राष्ट्रीय अध्यक्ष आणि राज्याचे उपमुख्यमंत्री अजित पवार यांनी आज राष्ट्रवादी काँग्रेसच्या कार्यालयात पक्षाच्या निवडणूक ‘कॅम्पेन एलईडी व्हॅन’ला हिरवा झेंडा दाखवला. राष्ट्रवादी काँग्रेसने समाजातील विविध घटकांसाठी केलेली विकासकामे आणि लोकाभिमुख निवडणुकीतील आश्वासने लोकांपर्यंत पोहोचविण्यासाठी या एलईडी व्हॅन राज्यभर फिरणार आहेत. ऑडिओ-व्हिडिओ प्रचार साहित्यासह राष्ट्रवादी काँग्रेसतर्फे लढविल्या जाणाऱ्या प्रत्येक विधानसभा मतदारसंघात तीन एलईडी व्हॅन फिरून अजित पवार यांनी हाती घेतलेल्या कल्याणकारी कामांचा प्रसार करणार आहेत.

यावेळी बोलताना राष्ट्रवादी काँग्रेसचे प्रदेशाध्यक्ष सुनील तटकरे म्हणाले की, या एलईडी व्हॅनमध्ये महिलांना १५०० रुपयांची आर्थिक मदत देणारी लाडकी बहिण योजनेची माहिती देण्यात आली आहे, अडीच कोटींहून अधिक महिलांना या योजनेचा लाभ मिळाला असून बळीराजा विज सवलत योजनेच्या माध्यमातून सरकार ४४ लाखांहून अधिक शेतकऱ्यांना वीज माफी देत आहे. महाराष्ट्रातील जनतेच्या कल्याणासाठी काम करण्यासाठी राष्ट्रवादी काँग्रेस कटिबद्ध असल्याचा पुनरुच्चार त्यांनी केला आणि राज्यातील जनतेच्या सेवेसाठी महायुती पुन्हा सत्तेत येईल, असा विश्वास व्यक्त केला. विधानसभा निवडणुकीत जागा जिंकण्याच्या दृष्टीने राष्ट्रवादीचा स्ट्राईक रेट चांगला असेल, असा विश्वास त्यांनी व्यक्त केला.

गेल्या काही आठवड्यांपासून राष्ट्रवादीच्या विधानसभा निवडणुकीच्या प्रचाराला वेग आला असून, विविध पक्षांच्या डझनभर प्रमुख नेत्यांनी पक्षात प्रवेश केला आहे. प्रचाराच्या हायटेक पद्धतीच्या माध्यमातून आपला संदेश थेट मतदारांपर्यंत पोहोचवण्याचा पक्षाचा उद्देश आहे. प्रचाराचा हा प्रकार राज्यालाही नवा आहे. राष्ट्रवादी काँग्रेस आपल्या निवडणूक प्रचारात तंत्रज्ञानाचा मोठ्या प्रमाणात वापर करत आहे. मतदारांशी संपर्क साधण्याचे नवे मार्ग शोधण्यासाठी पक्षाने आर्टिफिशियल इंटेलिजन्सचाही प्रयोग केला आहे.