अजित पवार गटाचे शहराध्यक्षपद बहल यांच्याकडे?
पिंपरी : तीन महिन्यांच्या प्रतीक्षेनंतर राष्ट्रवादीला (अजित पवार) पिंपरी-चिंचवडमध्ये शहराध्यक्ष मिळणार असून विधानपरिषदेची आमदारकी मिळावी यासाठी इच्छुक असलेले माजी महापौर, माजी शहराध्यक्ष योगेश बहल यांच्याकडेच पुन्हा शहराध्यक्षपदाची जबाबदारी सोपविली जाणार आहे. लवकरच अधिकृत घोषणा केली जाणार असल्याचे सूत्रांनी सांगितले.
चिंचवड विधानसभा मतदारसंघ राष्ट्रवादीला (अजित पवार) न मिळाल्यास महाविकास आघाडीत जाण्याचा माजी नगरसेवकांनी दिलेला इशारा, शहराध्यक्ष नियुक्त केला जात नसल्याने व्यक्त केलेली नाराजी, माजी नगरसेवक भाऊसाहेब भोईर यांनी निवडणूक लढविण्याचा निर्धार करत सोडलेले टीकेचे बाण, माजी नगरसेवकांनी जेष्ठ नेते शरद पवार यांची घेतलेली भेट या सर्व राजकीय घडामोडींच्या पार्श्वभूमीवर उपमुख्यमंत्री अजित पवार यांनी पिंपरी-चिंचवडमधील पक्षाच्या पदाधिकाऱ्यांची बारामतीमध्ये बैठक घेतली. भोसरीतून विधानसभा निवडणूक लढविण्यासाठी इच्छुक असलेल्या अजित गव्हाणे यांनी १६ जुलै २०२४ रोजी राष्ट्रवादीच्या (अजित पवार) शहराध्यक्षपदाचा राजीनामा दिला. माजी नगरसेवकांसह राष्ट्रवादी (शरद पवार) पक्षात प्रवेश केला. तीन महिने होत आले आणि विधानसभा निवडणूक तोंडावर असतानाही शहराध्यक्ष नियुक्त केला जात नसल्याने पदाधिकाऱ्यांनी नाराजी व्यक्त केली.
त्यावर सर्वांनी एकमताने नाव द्यावे दिल्यास मी लगेच जाहीर करतो असे पवार यांनी सांगितले. उपस्थितांनी माजी महापौर योगेश बहल यांचे नाव सुचविले. त्यानंतर तत्काळ पवार यांनी बहल यांच्या नावाची घोषणा केली. लवकरच बहल यांना अधिकृत पत्र दिले जाणार आहे. चिंचवड मधील माजी नगरसेवकांनी चिंचवड विधानसभा मतदारसंघ पक्षाकडे घेण्याची मागणी केली. जागा न मिळाल्यास युतीचा धर्म पाळावा लागेल असे अजित पवार यांनी स्पष्ट केले. दरम्यान, जागा राष्ट्रवादी (अजित पवार) पक्षाला न मिळाल्यास आम्ही भूमिका जाहीर करू असे माजी नगरसेवक मयूर कलाटे यांनी सांगितले.
अजित पवार यांनी बैठकीत शहराध्यक्षपदी माझ्या नावावर शिक्कामोर्तब केले आहे. दोन दिवसात अधिकृत पत्र मिळेल. त्यानंतर सर्वांना विश्वासात घेऊन नवीन कार्यकारिणी तयार केली जाईल, असे योगेश बहल यांनी सांगितले.
