श्रीक्षेत्र आळंदी येथील संत ज्ञानेश्वर महाराज संस्थानप्रमुख विश्वस्तपदी योगी निरंजन नाथ!
पालखी सोहळा सोहळा प्रमुखपदी डॉ. भावार्थ देखणे
आळंदी : श्रीक्षेत्र आळंदी येथील संत ज्ञानेश्वर महाराज संस्थान कमिटीच्या नुकत्याच झालेल्या बैठकीत योगी निरंजन नाथ यांची प्रमुख विश्वस्तपदी तर डॉ. भावार्थ देखणे यांची ज्ञानेश्वर महाराज पालखी सोहळा प्रमुखपदी नेमणूक करण्यात आल्याची घोषणा मावळते प्रमुख विश्वस्त ॲड. राजेंद्र उमाप यांनी केली.
डॉ. भावार्थ देखणे, ॲड. राजेंद्र उमाप व योगी निरंजन नाथ यांची गत वर्षी संत ज्ञानेश्वर महाराज संस्थान कमिटीच्या विश्वस्तपदी निवड झाली. ॲड. राजेंद्र उमाप यांनी प्रमुख विश्वस्त म्हणून तर योगी निरंजन नाथ यांनी पालखी सोहळा प्रमुख म्हणून गत वर्षी पदभार स्वीकारला.
आळंदी येथे नुकत्याच झालेल्या बैठकीत यंदाच्या प्रमुख विश्वस्त पदी योगी निरंजन नाथ तर संत ज्ञानेश्वर महाराज पालखी सोहळा प्रमुख पदी डॉ. भावार्थ देखणे यांची नेमणूक झाल्याची माहिती माजी विश्वस्त ॲड. राजेंद्र उमाप व संस्थेचे व्यवस्थापक ज्ञानेश्वर वीर यांनी पत्रकाद्वारे दिली.
योगी निरंजन नाथ यांनी योगी शांतीनाथ यांच्याकडून नाथ संप्रदायाची दीक्षा घेतली आहे. तसेच एक साधक म्हणून अनेक वर्षे संत ज्ञानेश्वर महाराज मंदिरात त्यांनी सेवा रुजू केली आहे. डॉ. भावार्थ देखणे यांच्या घरी वारकरी संप्रदायाची परंपरा असून वडील डॉ. रामचंद्र देखणे यांची धुरा पुढे नेत असताना ते एक वारकरी सांप्रदायिक कीर्तनकार, प्रवचनकार, भारुडकार, निरूपणकार व व्याख्याते म्हणून महाराष्ट्रात प्रसिद्ध आहेत.
