सांगवी ते किवळे रस्त्यावर भुयारी मार्ग

फक्त मुद्द्याचं न्यूज नेटवर्क
पिंपरी, प्रतिनिधी : सांगवी-किवळे रस्त्यावरील वाहनांची कोंडी कमी करण्यासाठी पिंपरी-चिंचवड महानगरपालिकेच्या वतीने किवळे रस्त्यावर रक्षक चौक येथे २६.४० मीटर रुंदीचा भुयारी मार्ग बांधण्यात येणार आहे. या प्रस्तावित भुयारी मार्गामुळे प्रवाशांना रहदारीसाठी सुलभता निर्माण होणार असून, यामुळे इंधन व वेळेचीही बचत होणार आहे.

सांगवी ते किवळे या रस्त्यावर ४५ व ३० मीटर रुंदीचा बीआरटी मार्ग विकसित करण्यात आला आहे. तसेच हा रस्ता पिंपरी चिंचवड व पुणे या दोन्ही महापालिकांना जोडणारा तसेच मुंबईकडे जाणाऱ्या वाहतुकीच्या दृष्टीने अत्यंत महत्वाचा रस्ता आहे. या रस्त्यावर वाकड, हिंजवडी, पुनावळे, रावेत, किवळे, ताथवडे या भागात होत असलेल्या विकासामुळे तसेच वाढत्या शहरीकरणामुळे वाहनांची वर्दळ वाढली आहे. वाढत्या रहदारीमुळे येथील वाहनांच्या रांगा लागून चौकामध्ये वाहतूक कोंडी होत आहे. या वाहतूक कोंडीचा बीआरटी बससेवा, शालेय विद्यार्थी बसेस, रोज ये-जा करणारे चाकरमानी तसेच मालवाहतूक प्रवाशांना त्रास सहन करावा लागत आहे. या सर्व समस्यांचे निराकरण करण्यासाठी रक्षक चौक येथे महापालिकेच्या वतीने भुयारी मार्गाची बांधणी करण्यात येणार आहे. या प्रकल्पास नुकत्याच झालेल्या स्थायी समिती बैठकीत मान्यता देण्यात आली आहे.

या भुयारी मार्गामुळे सांगवी ते किवळे रस्त्यावरील रहदारी कमी होण्यास मिळणार मदत होईल. तसेच रक्षक चौकातील वाहतूक कोंडी कमी होऊन प्रवाशांच्या इंधनाची तसेच वेळेची बचत होईल. बीआरटी बससेवा, शालेय विद्यार्थी बसेस, रोज ये-जा करणारे चाकरमानी तसेच मालवाहतूक प्रवाशांना होणार फायदा होईल आणि इंधनाच्या बचतीमुळे संभाव्य पर्यावरणाची हानी टळणार आहे.

या संदर्भात महापालिका आयुक्त तथा प्रशासक शेखर सिंह म्हणाले की, सांगवी ते किवळे रस्त्यावरून प्रवास करणाऱ्या प्रवाशांच्या संख्येमध्ये वाढ होत असल्याने, रक्षक चौकामध्ये वाहतूककोंडीचा भार वाढत आहे. वाढणाऱ्या कोंडीवर धोरणात्मक उपाय म्हणून भुयारी मार्ग विकसित करण्यात येणार आहे. भुयारी मार्गाची उभारणी केल्यानंतर या मार्गावरील वाहतूककोंडी कमी करून मार्गावरून प्रवास करणाऱ्या रहिवाशांसाठी सुव्यवस्था निर्माण होणार आहे आणि वाहतुकीस लागणारा कालावधी तसेच इंधनाच्या बचतीमुळे संभाव्य पर्यावरणाची हानी टाळता येणार आहे.

कसा असेल भुयारी मार्ग?
· भुयारी मार्गाची रुंदी – २६.४० मीटर (१८X५.५० मीटर)
· कामाची मुदत – १८ महिने
· निविदा रक्कम – २२ कोटी ७७ लाख
· निविदा स्विकृती रक्कम -१८ कोटी ६५ लाख
· भुयारी मार्गासाठी औंध बाजूस १२५ मीटर व जगताप डेअरीच्या बाजूस २४० मीटर लांबीचा रॅम्प विकसित करणार