झोपडपट्ट्यांमध्ये उभी राहणार अभ्यासिका
फक्त मुद्द्याचं न्यूज नेटवर्क
पिंपरी, प्रतिनिधी : पिंपरी-चिंचवड महापालिकेच्या झोपडपट्टी निर्मूलन आणि पुनर्वसन विभागाच्या वतीने आणि योजक स्वयंसेवी संस्थेच्या सहकार्याने मोशीतील संजय गांधीनगर येथे भारतरत्न डॉ. बाबासाहेब आंबेडकर अभ्यासिका उभारण्यात आली आहे. या धर्तीवर शहरातील सर्व झोपडपट्ट्यांमध्ये स्वयंसेवी संस्थांच्या मदतीने अभ्यासिका सुरू करण्यात येणार असल्याची माहिती आयुक्त शेखर सिंह यांनी दिली.
महापालिकेच्या पुढाकाराने सुरू करण्यात आलेला हा उपक्रम सर्व विद्यार्थ्यांसाठी आदर्श ठरणार आहे. या उपक्रमाचा अवलंब शहरातील सर्व क्षेत्रीय कार्यालयांच्या हद्दीत केला जाणार असल्याचे आयुक्त सिंह यांनी सांगितले. विद्यार्थ्यांमध्ये अभ्यासाची गोडी निर्माण व्हावी, यासाठी अभ्यासिका सुरू केल्या जाणार आहेत. अभ्यासिकांमध्ये येणाऱ्या पाचवी ते बारावीपर्यंतच्या विद्यार्थ्यांसाठी शैक्षणिक आणि करियर विषयक मार्गदर्शन करण्यात येणार आहे, अशी माहिती झोपडपट्टी निर्मूलन व पुनर्वसन विभागाचे उपायुक्त अण्णा बोदडे यांनी सांगितले.
अतिरिक्त आयुक्त चंद्रकांत इंदलकर, उपायुक्त अण्णा बोदडे, योजक संस्थेच्या रेणू इनामदार या वेळी उपस्थित होत्या. अभ्यासिकेचा प्रकल्प वाखाणण्याजोगा आहे. या अभ्यासिकेत विद्यार्थ्यांना अभ्यासासाठी पुस्तके, शैक्षणिक साहित्य उपलब्ध करून देण्यात येणार आहे. मोफत शैक्षणिक, करियर मार्गदर्शन अशा सुविधा देण्यात येणार आहेत.
