ताथवडे रोड, विष्णूदेव नगर, पुनावळे येथील अनधिकृत जाहिरात फलक हटविले!
पिंपरी : पिंपरी चिंचवड शहरातील ताथवडे रोड, विष्णूदेव नगर, पुनावळे येथील अनधिकृतपणे ४०×३० आकाराचे जाहिरात फलक आकाशचिन्ह व परवाना विभागामार्फत उप आय़ुक्त (परवाना) राजेश आगळे यांच्या मार्गदर्शनानुसार मंगळवार .२२सप्टेंबर २०२६ रोजी कारवाई करून (लोखंडी स्टक्चरसह) निष्कासित करण्यात आला आहे.
पिंपरी चिंचवड महानगरपालिकेच्या कार्यक्षेत्रातील जाहिरात फलक संदर्भात महाराष्ट्र महानगरपालिका अधिनियामातील नियम २४४,२४५ तसेच महाराष्ट्र महानगरपालिका (आकाशचिन्ह व स्कायसाईन) व जाहिरात प्रदर्शित करण्याचे नियमन व नियंत्रण नियम २०२२ चे अधिनिर्गत तरतुदीनुसार महापालिकेची पुर्व परवानगी घेऊनच खाजगी जागेत जाहिरात फलक उभा करणेची तरतुद आहे.
पिंपरी चिंचवड हे शहर देशपातळीवरती औद्योगिक शहर म्हणुन ओळखले जाते. सध्या पिंपरी चिंचवड शहर स्मार्ट सिटीच्या दिशेने वाटचाल करीत आहे. त्यानुसार शहराचे सौदर्य अबाधित राखणे आवश्यक आहे. महानगरपालिकेच्या हद्दीमध्ये महानगरपालिकेची पुर्व परवानगी न घेता जाहिरात फलक उभे केले जातात, त्यामुळे शहराचे विद्रुपीकरण होत असून महानगरपालिकेच्या आर्थिक उत्पन्नात देखील घट होत आहे. शहराच्या सौंदर्यात आणि महसुलात वाढ व्हावी याकरिता अनधिकृत जाहिरात फलकावर प्रतिबंध व नियंञण म्हणून आकाशचिन्ह व परवाना विभागामार्फत अनधिकृत जाहिरात फलकांची स्थळ पहाणी करून ते तातडीने निष्कासित करण्याची मोहिम व कारवाई सद्यस्थितीत शहरात सुरू आहे.
मागील महिन्यामध्ये ताथवडे येथील अनधिकृत जाहिरात फलक, तसेच थरमॅक्स चौक, समर्थ सहकारी बॅकेच्या इमारती वरील तसेच सर्व्हे नं,१७५/९,काळीभित रोड, चोवीसावाडी येथील अनधिकृत जाहिरात फलक निष्कासित करण्यात आले आहे. पिंपरी चिंचवड महापालिकेच्या हद्दीतील सर्व जाहिरात एजन्सींना सुचित करणेत येते की, या पुढे शहरामध्ये अनधिकृत जाहिरात फलक उभे करणेत येऊ नये, असे अनधिकृत जाहिरात फलक उभे केल्याचे निदर्शनास आलेस ते पिंपरी चिंचवड महानगरपालिके तर्फे तात्काळ निष्कासित करणेत येतील. याची गंभीरपणे नोंद घ्यावी.
