पूजा खेडकरच्या अपंगत्व प्रमाणपत्राबद्दल होणार चौकशी
फक्त मुद्द्याचं न्यूज नेटवर्क
पिंपरी, प्रतिनिधी : यशवंतराव चव्हाण स्मृती रुग्णालय अर्थात वायसीएम रुग्णालयाने प्रशिक्षणार्थी आयएएस पूजा खेडकरला डाव्या गुडघ्यात सात टक्के कायमस्वरूपी अधू असल्याचे अपंगत्वाचे प्रमाणपत्र दिले होते. त्या प्रमाणपत्राबाबत दिव्यांग कल्याण आयुक्तालयाने शंका उपस्थित केली आहे. चौकशी करण्याचे आदेश दिले होते. त्यामुळे रुग्णालयाचे अधिष्ठाता डॉ. राजेश वाबळे यांच्यासह अनेकजण अडचणीत येणार आत.
प्रशिक्षणार्थी आयएएस पूजा खेडकरचे कारनामे पुढे येत असताना त्यांच्यामुळे अनेकांना चौकशीच्या फेऱ्यास सामोरे जावे लागत आहे. पिंपरीतील वायसीएमने पूजा खेडकरला डाव्या गुडघ्यात सात टक्के कायमस्वरूपी अधू असल्याचे अपंगत्वाचे प्रमाणपत्र दिले होते. मात्र या प्रमाणपत्राबाबत शंका उपस्थित करत दिव्यांग कल्याण आयुक्तालयाने चौकशी करण्याचे आदेश दिले होते. या अनुषंगाने अनेक गोष्टी समोर येत आहेत. पूजाला दिलेल्या अपंगत्व प्रमाणपत्रासह चौकशी अहवालाबाबत ही माध्यमांनी अनेक प्रश्न उपस्थित केले होते. त्यालाच अनुसरून दिव्यांग कल्याण आयुक्तालयाने डॉ राजेंद्र वाबळेंचा चौकशी अहवाल फेटाळला आहे.
डॉ वाबळेंच्या स्वतंत्र चौकशीची सूचना
पिंपरी पालिकेच्या वायसीएम रुग्णालयासह डॉ वाबळेंची स्वतंत्र चौकशी करावी, असं थेट वैद्यकीय शिक्षण प्रधान सचिवांसह राज्य सरकारच्या संबंधित विभागांना कळवलं आहे. ज्यांच्या सहीने पूजाला अपंगत्वाचे प्रमाणपत्र दिले. त्या वाबळेंनी ही चौकशी कशी काय केली? हे योग्य आहे का? शिवाय अपंगत्व ठरविण्यासाठी तपासण्यात आलेल्या एमआरआय अहवालावर दिव्यांग आयुक्तालयाने शंका उपस्थित करत, डॉ. वाबळेंचा चौकशी अहवाल फेटाळला आहे. त्यामुळे वाबळे यांच्यासह प्रमाणपत्र देणारेही चौकशीच्या फेऱ्यात सापडणार आहेत.
