चिखली येथे तडीपार गुंडाला पिस्तुलासह अटक!
पिंपरी : पुणे जिल्ह्यातून दोन वर्षांसाठी तडीपार केलेल्या गुंडाला चिखली पोलिसांनी पिस्तुलासह अटक केली. ही कारवाई गुरुवारी (दि.२७) चिखली येथे करण्यात आली. अनुराग परशुराम कांबळे (वय १९, रा. चिखली) असे अटक केलेल्या आरोपीचे नाव आहे.
याप्रकरणी पोलीस अंमलदार नारायण सोमवंशी यांनी चिखली पोलीस ठाण्यात फिर्याद दिली आहे. पोलिसांनी दिलेल्या माहितीनुसार, आरोपी अनुराग कांबळे याला पिंपरी चिंचवड पोलिसांनी दोन वर्षांसाठी पुणे जिल्ह्यातून तडीपार केले आहे. त्याचा तडीपारीचा कालावधी संपण्यापूर्वी तो शहरात आला. तसेच त्याने स्वतःकडे शस्त्र बाळगले.
याबाबत माहिती मिळाल्यानंतर चिखली पोलिसांनी अनुराग कांबळे याला ताब्यात घेतले. त्याच्याकडून तीस हजार पाचशे रुपये किमतीचे एक देशी बनावटीचे पिस्तूल आणि एक जिवंत काडतूस जप्त केले आहे. चिखली पोलीस तपास करीत आहेत.
