हिंजवडीत ‘पीएमआरडीए’चा अनधिकृत होर्डिंगवर हातोडा!
पीएमआरडीए हद्दीत आजपासून अनधिकृत होर्डिंगविरोधात जोरदार कारवाई सत्र सुरू
पिंपरी : पुणे महानगर प्रदेश विकास प्राधिकरणाने (पीएमआरडीए) आपल्या हद्दीतील अनधिकृत होर्डिंगविरोधात धडक मोहीम उघडली आहे. सोमवारी (दि.१३) हिंजवडी येथील अनधिकृत होर्डिंगवर कारवाई करत प्रशासनाने ते जमीनदोस्त केले.
महानगर आयुक्त डॉ. अभिजीत चौधरी यांनी अनधिकृत बांधकामे आणि होर्डिंगवर कठोर कारवाई करण्याचे आदेश दिले आहेत. त्यानुसार, अतिक्रमण निर्मूलन विभागाने ही मोहीम तीव्र केली . हिंजवडी येथील गट क्रमांक २०६ मधील अंदाजे १२५० चौरस फूट क्षेत्रावर उभारण्यात आलेले होर्डिंगचे लोखंडी सांगाडे (फ्रेम) नियमबाह्य असल्याचे पाहणीत आढळले होते. त्यानंतर ही कारवाई करण्यात आली.
‘पीएमआरडीए’ने बजावलेल्या नोटिशीनुसार, महाराष्ट्र प्रादेशिक व नगररचना अधिनियम १९६६ च्या कलम ५२ ते ५६ अन्वये ही कारवाई करण्यात आली. होर्डिंगसाठी कोणतीही पूर्वपरवानगी घेण्यात आली नव्हती. केवळ आर्थिक नुकसानच नव्हे, तर अशा अनधिकृत होर्डिंगमुळे जीवितहानी होण्याची शक्यता नाकारता येत नाही, स्पष्ट केले आहे. नोटिशीकडे दुर्लक्ष केल्यास भारतीय दंड संहितेच्या कलम ३३६ (जीवितास धोका निर्माण करणे) आणि कलम ४२० अन्वये गुन्हे दाखल होऊ शकतात.
“अनधिकृत होर्डिंगप्रकरणी एक महिना ते तीन वर्षांपर्यंत कारावास आणि पाच हजार रुपयांपर्यंतच्या दंडाची तरतूद आहे. संबंधित धारकांनी स्वतःहून आपली अनधिकृत होर्डिंग काढून घ्यावीत, अन्यथा प्राधिकरणाकडून होणाऱ्या कारवाईचा खर्च आणि दंड वसूल केला जाईल,” असा इशारा अतिक्रमण निर्मूलन विभागाचे प्रभारी सहआयुक्त हिंमत खराडे यांनी दिला आहे.
ही कारवाई महानगर आयुक्त डॉ. अभिजीत चौधरी यांच्या आदेशानुसार, अतिरिक्त महानगर आयुक्त के. मंजुलक्ष्मी, मुख्य दक्षता अधिकारी अमोल झेंडे यांच्या मार्गदर्शनाखाली अतिक्रमण निर्मूलन विभागाचे प्रभारी सहआयुक्त हिंमत खराडे, तहसीलदार आशा होळकर आणि तहसीलदार रवींद्र रांजणे यांच्या पथकाने पार पाडली. ज्या होर्डिंगधारकांकडे रितसर परवानगी नाही, त्यांनी तातडीने अर्ज करून प्रक्रिया पूर्ण करावी, अन्यथा येत्या काळात संपूर्ण पीएमआर हद्दीत अशीच धडक कारवाई सुरू राहील, असेही ‘पीएमआरडीए’ प्रशासनातर्फे स्पष्ट करण्यात आले आहे.
