वर्क फ्रॉम होम देण्याच्या आमिषाने २२ लाखांची फसवणूक!
पिंपरी : प्राईज रन नावाच्या कंपनीमध्ये वर्क फ्रॉम होमचे काम देण्याचे आमिष दाखवून डिपॉझिट स्वरूपात तब्बल २२ लाखांहून अधिक रक्कम घेऊन फसवणूक केल्याची घटना पिंपरी येथे उघडकीस आली. ही घटना २५ फेब्रुवारी ते २७ सप्टेंबर या कालावधीत घडली.
याप्रकरणी पिंपरी पोलीस ठाण्यात एका ३४ वर्षीय व्यक्तीने तक्रार दाखल केली आहे. त्यानुसार क्रिष्णा वेण्णी (२५, तामिळनाडू) विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी महिलेने फिर्यादीच्या टेलिग्रॉम ॲपवर मेसेज करून ‘प्राईज रन’ कंपनीमध्ये वर्क फ्रॉम होमसाठी काम देण्याचे आमिष दाखवले. तिने फिर्यादीकडून डिपॉझिटच्या स्वरूपात एकूण २२ लाख ६४ हजार ५६८ रुपये घेतले. मात्र, वर्क फ्रॉम होमचे कमिशन न देता तसेच डिपॉझिट स्वरूपात घेतलेली रक्कमही परत न करता तिने फिर्यादीची फसवणूक केली. पिंपरी पोलीस तपास करत आहेत.
वर्क फ्रॉम होमच्या आमिषाने नऊ लाखांची फसवणूक!
भोसरी : वर्क फ्रॉम होम देण्याचे आमिष दाखवत एका अज्ञात व्यक्तीने एका नागरिकाची तब्बल ९ लाख ६ हजार २४१ रुपयांची फसवणूक केली. ही घटना ३ मे २०२४ ते १ जून २०२४ या कालावधीत मोशी प्राधिकरण येथे घडली.
याप्रकरणी एका ४८ वर्षीय व्यक्तीने एमआयडीसी भोसरी पोलीस ठाण्यात फिर्याद दिली आहे. त्यानुसार अनोळखी व्यक्ती विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, टेलिग्राम आयडी धारकाने फिर्यादींना ग्रुपमध्ये ॲड केले. त्यानंतर त्यांचे अकाऊंट तयार करून रेटिंगच्या ॲडचे टास्क करायला लावले. या कामावर मोठा परतावा देण्याचे आमिष दाखवून त्यांच्याकडून वेगवेगळ्या बँक खात्यांवर एकूण ९ लाख ६ हजार २४१ रुपये भरण्यास लावून त्यांची फसवणूक केली. एमआयडीसी भोसरी पोलीस तपास करत आहेत.
