बिलाचे पैसे देताना मोबाईल क्रमांक बंधनकारक नाही
फक्त मुद्द्याचं न्यूज नेटवर्क
पिंपरी, प्रतिनिधी : वस्तू खरेदी केल्यानंतर तसेच हॉटेल, रेस्टॉरंट किंवा कॉफी दुकानात देयक तयार करताना ग्राहकांनी आपल्या मोबाईल क्रमांकाची माहिती देणे बंधनकारक नाही. कोणीही आपली वैयक्तिक माहिती देऊ नये, असे आवाहन जिल्हा पुरवठा अधिकारी दिनेश तावरे यांनी केले आहे.
याबाबत ग्राहक व्यवहार मंत्रालयाने २०२३ मध्येच सूचना जाहीर केल्या आहेत. त्याप्रमाणे ग्राहकांनी शॉपिंग मॉल, किरकोळ व्यापाऱ्यांकडे वस्तू खरेदी केल्यानंतर तसेच हॉटेल, रेस्टॉरंट किंवा कॉफीच्या दुकानात ग्राहकांनी सेवा घेतल्यानंतर शेवटी देयक तयार करताना मोबाईल क्रमांक देणे बंधनकारक नाही, असे स्पष्ट केले आहे.
माहिती तंत्रज्ञान कायदा २०००च्या कलम ७२ अ अंतर्गत वस्तू विक्रीच्या वेळी मिळालेल्या मोबाईल क्रमांकाचा ग्राहकाच्या संमतीशिवाय इतरत्र वापर करणे ही व्यक्तीशी असलेल्या कायदेशीर कराराचा भंग आहे. ग्राहकाची वैयक्तिक माहिती उघड करणे हा दंडनीय गुन्हा आहे. असे केल्याने ग्राहकांचे नुकसान झाल्यास तीन वर्षापर्यंत कारावासाची शिक्षा अथवा पाच लाख रुपयांपर्यंतचा दंड करण्याबाबत कायद्यात तरतूद आहे.
