अण्णा बनसोडे झाले ‘टेन्शन फ्री’; आसवानी गटाची नाराजी दूर!

पिंपरी : शहरातील राजकारणात आज मोठा ट्विस्ट आला. पिंपरी राखीव मतदारसंघातील महायुतीचे आमदार अण्णा बनसोडे टेन्शन फ्री झाले आहेत. माजी महापौर योगेश बहल यांच्या शिष्टाईने आसवानी गटाची नाराजी दूर झाली आहे. अण्णा बनसोडे यांना उमेदवारी देण्यावरून महायुतीत प्रचंड नाराजी होती. मात्र बनसोडे यांनी राजकीय मुत्सद्देगिरीने सर्व विरोधकांची मनधरणी केली आहे. उपमुख्यमंत्री अजित पवार यांच्या उपस्थितीमध्ये आज बनसोडे यांच्या विजयासाठी वज्रमूठ करण्यात आली.

दरम्यान, युवा नेते पार्थ पवार यांनी गुरुवारी तब्बल दोन तास पिंपरी व्यापारी फेडरेशनचे अध्यक्ष श्रीचंद आसवाणी यांच्या निवासस्थानी प्रदीर्घ चर्चा केली. शहराध्यक्ष योगेश बहल यांनी यशस्वी शिष्टाई केली आणि आमदार बनसोडे यांचा विजय दृष्टीक्षेपात आला. विशेष म्हणजे, उपमुख्यमंत्री अजित पवार यांनी आसवाणी यांना आज सकाळी मुंबई येथे बोलावून घेतले. त्यांच्या समवेत योगेश बहल, डब्बू आसवाणी, काळुराम पवार, चेतन घुले, प्रसाद शेट्टी, भाजपचे शितल शिंदे आदी उपस्थित होते.

आमदार बनसोडे कोणाशी संपर्क करत नाहीत, ते अकार्यक्षम आहेत, दहा वर्षांत एकही काम केलेले नाही, विधीमंडळात तोंड उघडले नाही, कार्यकर्ते आणि मतदारांनी कधीच उपलब्ध नसतात अशा तक्रारी आल्या होत्या. पिंपरीतील व्यापाऱ्यांचे प्रतिनिधीत्व करणाऱ्या संघटनेने त्याबाबत कठोर भूमिका घेतली होती. स्वतः श्री आसवाणी, माजी उपमहापौर डब्बू आसवाणी तसेच पक्षाचे नवनियुक्त शहराध्यक्ष योगेश बहल यांच्यासह २७ माजी नगरसेवकांनी आमदार बनसोडे यांच्या उमेदारीला विरोध केला होता. मात्र, उमेदवारी मिळाल्यानंतर बहल यांनी ही निवडणूक हातात घेतली आणि महायुतीची वज्रमूठ बांधायला सुरूवात केली. विशेष म्हणजे, योगेश बहल यांच्या नेतृत्त्वाखाली २००९, २०१४ ची निवडणूक लढवण्यात आली होती, ही बाब दुर्लक्षीत करुन चालणार नाही. सुरूवातीला पुणे जिल्ह्यात सर्वाधिक अपक्षांची माघार घेत आण्णा बनसोडे यांच्या पाठिशी मोठी ताकद त्यांनी उभा केली. मतदानाला चार दिवस शिल्लक असताना सर्व विरोधकांना एकत्र करीत मनधरणी केली आणि महाविकास आघाडीवर मात केली आहे.

पार्थ पवार यांचे मतदार संघात विशेष लक्ष…
दरम्यान, पार्थ पवार यांनी सर्व सूत्र हातात घेतली आणि एका एकाची समजूत काढली. त्यानंतर बहल यांच्यासह काळुराम पवार, जितेंद्र ननावरे यांनी माघार घेतली. पार्थ पवार हे सलग आठवडाभर शहरात तळ ठोकून आहेत. गुरुवारी त्यांनी आसवाणी यांच्या निवासस्थानी स्वतंत्रपणे भेट घेतली. कोणत्याही परिस्थितीत तुम्ही माघार घ्या आणि बनसोडे यांच्या बरोबर सक्रीय होण्यासाठी आग्रह केला. त्याला त्यांनी सकारात्मक प्रतिसाद दिला आणि पिंपरी कॅम्पमधून आमदार बनसोडे यांच्या निर्णायक आघाडीवर शिक्कामोर्तब करण्यात आले.