इंडिगोच्या विमानात धमकीचा कागद

फक्त मुद्द्याचं न्यूज नेटवर्क
नागपूर, प्रतिनिधी : इंडिगो एअरलाइन्सचे फ्लाइट क्रमांक ६ ई- ७३०८ या जबलपूर – हैदराबाद विमानाच्या शौचालयात रविवारी ‘ब्लास्ट अॅट ९ एएम’ असे लिहीलेला कागद आढळल्यामुळे खळबळ उडाली. त्यानंतर विमानाचे येथील डॉ. बाबासाहेब आंबेडकर आंतरराष्ट्रीय विमानतळावर इमर्जन्सी लॅण्डिंग करण्यात आले.

इंडिगोचे जबलपूर – हैदराबाद हे विमान नियोजित वेळापत्रकानुसार, सकाळी ७.५५ वाजता जबलपूर येथून उडाले. हे विमान हैदराबाद येथे सकाळी ९.५५ वाजता पोहचणे अपेक्षित होते. दरम्यान, सकाळी ९ वाजतादरम्यान कॅबिन क्रु मेंबर ज्योतिस्मिता सैकिया यांना विमानाच्या शौचालयातील कागदी रोलच्या तुकड्यावर ‘ब्लास्ट अॅट ९ एएम’ असे इंग्लिशमध्ये लिहीलेले आढळले. त्यांनी ही माहिती वैमानिकांना दिली.

तातडीने पुढील प्रक्रिया करत सुरक्षा यंत्रणांना कळवण्यात आले. नागपूर विमानतळाचे संचालन करणाऱ्या मिहान इंडिया लिमिटेडशी संपर्क साधण्यात आला. त्यानंतर सकाळी ९.२१ वाजता या विमानाचे नागपूर विमानतळावर इमर्जन्सी लॅण्डिंग झाले. विमान उतरताच बीडीडीएस, सीआयएसएफ आणि डॉग स्क्वॉडने विमानाची तपासणीला सुरुवात केली. या प्रकरणी सोनेगाव पोलीस स्टेशन येथे एफआयआर दाखल करण्यात आली आहे. या घटनेला इंडिगो एअरलाइन्सने देखील दुजोरा दिला आहे. सुरक्षा यंत्रणांद्वारे विमानाची तपासणी सुरू करण्यात आली.

इंडिगोनेही एक प्रसिद्धीपत्रक जारी करून सांगितले की, धमकीचा संदेश मिळाल्यानंतर विमान नागपूर विमानतळावर उतरवण्यात आले. सर्व प्रवाशांना विमानातून बाहेर काढण्यात आले आणि विमानात ठेवलेल्या सामानाची तपासणी करण्यात आली. तासाभराच्या विलंबानंतर विमानाने पुन्हा हैदराबादसाठी उड्डाण केले. त्याचबरोबर धमकी देणाऱ्या अज्ञात व्यक्तीविरुद्ध विमानतळ प्रशासनाने सोनेगाव पोलिसात गुन्हा दाखल केला आहे.