लाडकी बहीण योजनेचा लाभ घेतलेल्या अपात्र 26 लाख महिलांची चौकशी होणार!
मुंबई : मुख्यमंत्री माझी लाडकी बहीण योजनेअंतर्गत वर्षभरापासून एक कोटी पेक्षा जास्त महिलांना दरमहा पंधराशे रुपयांची आर्थिक मदत दिली जात आहे .विधानसभा निवडणुकीनंतर लाभार्थ्यांची कठोर छाननी सुरू करण्यात आली असून छाननीत अपात्र ठरलेल्या 26 लाख महिलांना चौकशीला सामोरे जावे लागणार आहे .सरकारी अधिकारी आता लाभार्थ्यांच्या घरोघरी जाऊन चौकशी करणार आहेत .
रक्षाबंधनाच्या मुहूर्तावर लाडक्या बहिणीच्या बँक खात्यात जुलै 2025 चा पंधराशे रुपयांचा हप्ता जमा झाला आहे. हा हप्ता जमा झाल्यानंतर राज्य शासनाने अपात्र ठरलेल्यांच्या चौकशीचे संकेत दिले आहेत .चौकशी करण्यासाठी महिला बालकल्याण विभागाकडून जिल्हा प्रशासनाला आदेश देण्यात आला आहे .याबाबत जिल्हा प्रशासनाला आदेशाचे पत्र देण्यात आले आहे. जिल्हा पातळीवरील महिला आणि बालकल्याण विभागाच्या अंगणवाडी सेविकांच्या माध्यमातून ही अपात्र लाभार्थी महिला शोधण्याची मोहीम आता सुरू करण्यात आली आहे.
लाडकी बहीण योजनेत एकाच घरातील दोन पेक्षा जास्त महिलांना या योजनेचा लाभ घेता येणार नाही .दोन पेक्षा जास्त आणि 21 ते 65 वर्षे वयोगटात न बसणाऱ्या तब्बल 26 लाख महिलांना या योजनेचा लाभ घेतल्याची माहिती समोर आली होती. या महिलांची यादी महिला आणि बालकल्याण विभागाने तयार केली आहे .
