पर्यटकांना धरण परिसरात न जाण्याचे आवाहन
लोणावळा : लोणावळ्यातील पर्यटकांचे आकर्षणाचे ठिकाण असलेल्या भुशी धरणाच्या पायऱ्यांवरून प्रचंड वेगाने पाणी वहात असल्याने पर्यटकांनी सुरक्षेच्या कारणास्तव धरण परिसरात जाऊ नये असे आवाहन लोणावळा पोलिसांनी केले आहे. महाराष्ट्रात विविध भागांमध्ये जोरदार पाऊस सुरू आहे. पुणे जिल्ह्यातील मावळ मुळशी परिसरात जोरदार पाऊस कोसळत आहे.
लोणावळा परिसरात शनिवार पासून धुव्वाधार पाऊस सुरू आहे. या पावसामुळे सर्वत्र मोठ्या प्रमाणात पाणी साचू लागले असून भुशी धरण ओव्हरफ्लो होऊन धरणाच्या पायऱ्यांवरून प्रचंड वेगाने पाणी वहात आहे. पाण्याचा वेग जास्त असल्याने त्यामध्ये जाऊन उभे रहाणे शक्य नसल्याने पर्यटक पाण्याच्या प्रवाहासोबत वाहून जाऊ शकतात.
आज सकाळी पोलीस प्रशासनाने भुशी धरण परिसरातील पाण्याच्या प्रवाहाची पाहणी करत पर्यटकांना धरण भागात न जाण्याचे आवाहन केले आहे. तसेच जोरदार पावसामुळे डोंगर भागातून वाहणारे धबधबे मोठ्या प्रमाणात प्रवाहित झाले असल्याने त्यांच्या खाली थांबणे अथवा डोंगर भागात जाण्याचा प्रयत्न करणे हे धोकादायक ठरणारे असल्याने पर्यटकांनी काळजी घ्यावी व धोकादायक ठिकाणी जाण्याचे टाळावे असे आवाहन लोणावळा पोलीस व नगर परिषद प्रशासन यांच्याकडून करण्यात आले आहे.
