साई भक्तांना मिळणार पाच लाखापर्यंत विमा संरक्षण!
गुढी पाडव्याच्या दिवशी साई संस्थानची मोठी घोषणा
शिर्डी : शिर्डी येथे साईबाबांच्या दर्शनासाठी येणाऱ्या भाविकांसाठी एक मोठा दिलासा देणारा निर्णय साई संस्थानाने घेतला आहे. साईभक्तांना आता ५ लाख रुपयांपर्यंतचे विमा संरक्षण मिळणार आहे. हा निर्णय भक्तांच्या सुरक्षेच्या दृष्टीने महत्त्वाचा असून, त्यामुळे शिर्डीच्या यात्रेचा अनुभव अधिक सुरक्षित होणार आहे.
शिर्डीमध्ये दररोज लाखो भक्त साईबाबांच्या दर्शनासाठी येतात. ‘सबका मालिक एक’ हा संदेश देणाऱ्या साईबाबांच्या भक्तांमध्ये सर्व स्तरांतील लोकांचा समावेश असतो. काही वेळा यात्रा दरम्यान अनपेक्षित घटना घडतात, जसे की अपघात, आजारपण किंवा इतर आपत्ती. अशा परिस्थितीत साई संस्थानाने दिलेल्या विमा सुविधेचा लाभ संबंधित भक्त किंवा त्यांच्या कुटुंबीयांना मिळणार आहे.
कशा प्रकारे मिळणार विमा संरक्षण?
साई दर्शनासाठी येणाऱ्या भाविकांनी साई संस्थानच्या अधिकृत वेबसाईटवर नोंदणी करणे बंधनकारक असेल. भक्तांनी त्यांच्या प्रवासापूर्वी ही नोंदणी करावी लागेल. एकदा नोंदणी झाल्यावर, भक्त घरातून निघाल्यापासून साई मंदिरात दर्शन होईपर्यंतच्या कालावधीसाठी विमा संरक्षणाच्या कवचाखाली असतील. या कालावधीमध्ये काही अप्रिय घटना घडल्यास ५ लाख रुपयांपर्यंतचे विमा संरक्षण संबंधित भक्त किंवा त्यांच्या कुटुंबियांना मिळेल.
साई संस्थानचे मुख्य कार्यकारी अधिकारी गोरक्ष गाडीलकर यांनी या निर्णयाची माहिती देताना सांगितले की, साईभक्तांसाठी हा निर्णय घेण्यात आला असून, त्यामुळे त्यांच्या सुरक्षेची खात्री होणार आहे. दर्शनासाठी येणाऱ्या भाविकांना काही अडचण आली, तर संस्थानाच्या माध्यमातून त्यांना आर्थिक मदतीचा मोठा आधार मिळणार आहे
हा निर्णय साईभक्तांच्या सुरक्षिततेच्या दृष्टीने एक महत्त्वाचे पाऊल आहे. विशेषतः लांबून येणाऱ्या भाविकांसाठी हा विमा कवच मोठा आधार ठरणार आहे. वार्षिक उत्सव किंवा गर्दीच्या काळातही या निर्णयामुळे भक्तांचे संरक्षण सुनिश्चित होणार आहे.
