राज्याच्या युवा धोरण समितीवर आमदार अमित गोरखे निमंत्रित सदस्य!
पिंपरी : राज्य सरकारने राज्याच्या युवा धोरणाच्या आराखड्यासाठी स्थापन केलेल्या उच्चस्तरीय समितीवर पिंपरी चिंचवडचे विधान परिषदेचे आमदार अमित गोरखे यांची निमंत्रित सदस्य म्हणून नियुक्ती करण्यात आली आहे .ही समिती मुख्यमंत्र्यांच्या मार्गदर्शनाखाली कार्य करणार आहे. मुख्यमंत्री देवेंद्र फडणवीस यांच्या नेतृत्वाखालील सरकारने हा निर्णय घेतला आहे.
युवा पिढीच्या सर्वांगीण विकासाला नवी दिशा देण्याचे धोरण राज्य सरकारचे आहे. युवकांचे शिक्षण, रोजगार ,कौशल्य विकास, उद्योजकता, क्रीडा, कला, संस्कृती आणि सामाजिक सहभाग यासारख्या महत्त्वाच्या क्षेत्रावर हे धोरण लक्ष केंद्रित करणार आहे. युवकांना यासाठी योग्य संधी उपलब्ध करून देणे त्यांचे प्रश्न समजून घेणे आणि त्यांच्या स्वप्नांना बळ देणारे दूरदृष्टीचे धोरण तयार करणे हा या समितीचा उद्देश आहे .
आमदार अमित गोरखे यांची इंडो चायना युथ फेस्टिवल चायना मध्ये भारताचे प्रतिनिधित्व करण्यासाठी यापूर्वी निवड झाली होती .या नियुक्ती बद्दल बोलताना आमदार गोरखे म्हणाले की ,राज्यातील युवक हेच आपल्या राज्याचे आणि देशाचे भविष्य आहे .त्यांच्या क्षमतांना वाव देऊन आकांक्षांना न्याय देणारे धोरण तयार करण्याची ही एक सुवर्णसंधी आहे .या समितीच्या माध्यमातून ग्रामीण तसेच शहरी भागातील युवकांच्या गरजा आणि अपेक्षा प्रभावीपणे मांडण्याचा आपण प्रयत्न करू.
