लंडन रिटर्न ,यूपीएससी पास तरुणाचा पुण्यातील विद्यापीठाला 2 कोटी 46 लाखाचा गंडा!

 ‘पुणे : हैदराबाद मधील उच्चशिक्षित तरुणाने पुण्यातील खाजगी विद्यापीठाला तब्बल दोन कोटीचा गंडा घातल्याचा प्रकार पुणे सायबर पोलिसांनी उघडकीस आणला आहे . हैदराबाद येथील सितैया शिलारू (वय 34 ) या आरोपीला हैदराबाद येथून अटक करण्यात आली आहे .

या आरोपीने आयआयटी मुंबईच्या प्राध्यापकाचे नाव वापरून पुण्यातील नामांकित अभियांत्रिकी महाविद्यालयाला एआय व ड्रोन प्रकल्प मिळवून देण्याचे आश्वासन दिले होते . या खोट्या आश्वासनाच्या आडून मोठ्या रकमेची फसवणूक करण्यात आली . हा तरुण लंडनून शिकून आलेला असून पीएचडी आणि यूपीएससी पास झालेला असताना देखील त्याने विद्यापीठाला वेगळी शक्कल लढवत गंडा घातला . विद्यापीठाच्या शैक्षणिक अधिकाऱ्याला सावित्रीबाई फुले पुणे विद्यापीठाच्या माजी कुलगुरूच्या नावाने मेसेज केला . त्यात आयआयटी मुंबईतील प्राध्यापक डॉक्टर चेतन कामत यांचा नंबर देण्यात आला होता. शासनाने मंजूर केलेल्या एआय व ड्रोन रिसर्च प्रकल्प देण्यासाठी फंडिंग प्रकल्पासाठी दोन टक्के रक्कम भरावी लागेल यावर विश्वास ठेवून विद्यापीठाने थेट दोन कोटी 46 लाख रुपये भरले . मात्र ज्यावेळी त्याला करारासाठी बोलावले त्यावेळी मात्र तो फरार झाला . त्यानंतर हा प्रकार विद्यापीठाच्या लक्षात आला .

पुणे सायबर पोलिसांनी या प्रकारानंतर त्याचा माग काढला हे सगळे पैसे त्याने त्याच्या खात्यावर घेतल्याची माहिती पोलिसांना मिळाली आणि पोलिसांनी त्याला हैदराबाद मध्ये जाऊन बेड्या ठोकल्या . आरोपी उच्चशिक्षित असून युकेमधून पीएचडी केलेली आहे . अनेक वर्ष प्राध्यापक म्हणून काम केल्याची माहिती आहे . त्याने युपीएससी पूर्व व मुख्य परीक्षा देखील उत्तीर्ण झाल्याचे पोलीस तपासात स्पष्ट झाले आहे. त्याच्यावर तेलंगणातील विविध ठाण्यात यापूर्वी अनेक गुन्हे नोंद असल्याची माहिती पोलिसांसमोर आली आहे. लंडन रिटर्न यूपीएससी पास झालेल्या तरुणाचा पुण्यातील विद्यापीठाला गंडा