गिलबिले खून प्रकरण; माजी नगरसेवक किसन महाराज तापकीर आरोपी!

पिंपरी चिंचवड राजकीय वर्तुळात खळबळ
पिंपरी : चऱ्होलीतील वडमुखवाडी येथे व्यावसायिक नितीन गिलबिले यांचा गोळीबार करून खून करणाऱ्या टोळीतील तिघांना अटक केल्यानंतर आता खुनाचा मुख्य सूत्रधार म्हणून माजी नगरसेवक किसन महाराज तापकीर यांचे नाव समोर आले आहे .दिघी पोलिसांनी त्याचा आरोपीमध्ये समावेश केला असून तापकीर याचा या गुन्ह्यातील सहभाग कोणत्या स्वरूपाचा आहे हे तपासात स्पष्ट व्हायचे आहे..

आरोपींनी त्यांचे नाव जबाबात घेतल्याने पिंपरी चिंचवड राजकीय वर्तुळात खळबळ उडाली आहे. नितीन शंकर गिलबिले (वडमुख वाडी) असे खून झालेल्या व्यावसायिकाचे नाव आहे. याप्रकरणी अमित जीवन पठारे (पठारे मळा चऱ्होली),विक्रांत सुरेश ठाकूर (सोळू ता. खेड) आणि सुमित फुलचंद पटेल (गायकवाड नगर ,दिघी )यांना यापूर्वी अटक केली आहे.

पोलिसांनी दिलेल्या माहितीनुसार बुधवार 12 नोव्हेंबर रोजी अलंकापुरम रस्त्यावर गिलबिले आणि त्यांच्या ओळखीतील काही जण थांबलेले असताना अमित पठारे आणि विक्रांत ठाकूर हे फॉर्च्युनर कार मधून तेथे आले. त्यांनी गिलबिले यांना कारमध्ये बसवून त्याच्या डोक्यात जवळून गोळी झाडली ,त्यात त्यांचा जागीच मृत्यू झाला .विक्रांत ठाकूर यांना ताम्हीणी घाटातून आणि अमित पठारे यांना वाघोली येथून अटक करण्यात आली.

खुनाचे कारण अद्यापही अस्पष्ट असून तपासा दरम्यान किसन महाराज तापकीर यांचे नाव आरोपींकडून समोर येत असल्याने तपासाची दिशा आता बदलली आहे .गुन्ह्यातील अचूक कारण, संबंध ,आर्थिक किंवा वैयक्तिक वाद ,तसेच तापकीर यांचा प्रत्यक्ष ,अप्रत्यक्ष हस्तक्षेप याबाबत पोलिसांकडून सखोल तपासणी सुरू आहे. तापकीर यांचा शोध दिघी पोलिसांनी सुरू केला असून पोलिसांनी त्यांच्या शोधासाठी स्वतंत्र पथक तयार केले केल्याचे सांगण्यात आले.