आयटी हबमध्ये कामाला लावतो असे सांगून १७ लाखांची फसवणूक!
हिंजवडी : हिंजवडी आयटी हबमध्ये कामाला लावतो, असे सांगत फ्लायनोट सॉस प्रायव्हेट लिमिटेड या कंपनीकडून फसवणूक करण्‍यात आली. ही घटना हिंजवडी येथे घडली. उपेश रंजीत पाटील (रा. हिंजवडी फेस २) असे अटक केलेल्‍या आरोपीचे नाव आहे. तसेच त्‍याच्‍या महिला साथीदाराच्‍या विरोधातही गुन्‍हा दाखल केला आहे.
फसवणूक प्रकरणी मयुर मुकुंद वाघ (वय २४, रा. काळेवाडी फाटा) यांनी शनिवारी (दि. २३) हिंजवडी पोलीस ठाण्‍यात फिर्याद दिली आहे.
पोलिसांनी दिलेल्‍या माहितीनुसार, आरोपींनी फिर्यादी व इतर उमेदवारांकडून १ लाख ते २.५ लाख रुपये प्रशिक्षण शुल्काच्या नावाखाली घेतले असून मिटद्वारे ३ महिन्यांचे ट्रेनिंग दिल्यानंतर नियुक्तीपत्र, ऑफर लेटर व पगार पत्रे देऊन विश्वास संपादन केला. मात्र, नंतर नापास झाल्‍याचे सांगत कोणताही पगार न देता आरोपींनी संपूर्ण रक्कम स्वतःच्या फायद्यासाठी वापरून घेतली. या प्रकरणी आरोपींनी एकूण १७ लाख १६ हजार ५०० रुपयांचा अपहार केला आहे. हिंजवडी पोलीस याबाबत अधिक तपास करीत आहेत.
या गुन्ह्याकडे सुरूवातीपासूनच गांभीर्याने लक्ष्य दिले होते. कारण 400 पेक्ष्या जास्त लोकांची फसवणूक झाली होतीच पण त्यांचे स्वप्न भंगले आहे. त्यांची तक्रार आल्या नंतर मी आणि माझ्या टीमने आयुक्‍तांच्या आदेशाने उपेश पाटील याला अटक केली आहे. अजून कोणाची फसवणूक झाली असल्‍यास त्‍यांनी हिंजवडी पोलिसांशी संपर्क करावा असे आवाहन वरिष्ठ पोलीस निरीक्षक बालाजी पांढरे यांनी केले आहे.
