संसार मोडल्याच्या संशयावरून दोन महिलांवर कोयत्याने वार!

पिंपरी: संसार उध्वस्त केल्याच्या संशयावरून एका तरुणाने महिलेवर आणि तिला वाचवण्यासाठी आलेल्या तिच्या बहिणीवर कोयत्याने वार करून गंभीर जखमी केले. ही घटना मंगळवार 24 फेब्रुवारी रोजी रात्री दहा वाजण्याच्या सुमारास जगतापनगर थेरगाव येथे घडली.

याबाबत उषा अतुल इंगवले यांनी काळेवाडी पोलीस ठाण्यात फिर्याद दिली आहे. पोलिसांनी योगेश संतोष रणदिवे (रा. जगतापनगर, थेरगाव) यांच्या विरोधात गुन्हा दाखल केला आहे.

पोलिसांनी दिलेल्या माहितीनुसार आरोपी योगेश यांचा असा गैरसमज होता की, फिर्यादीमुळे त्यांचा संसार मोडला आहे. याच रागातून त्याने फिर्यादीच्या डोक्यात आणि हातावर लोखंडी कोयत्याने वार केला. आरडाओरड ऐकून फिर्यादीची बहीण अशा बनसोडे बचावासाठी आली असता आरोपीने त्यांच्यावरही वार करून जखमी केले आणि तिथून पळ काढला. काळेवाडी पोलीस पुढील तपास करत आहे .