महापालिकांच्या आरक्षण सोडतीचे वेळापत्रक आयोगाकडून जाहीर !
मुंबई : राज्य निवडणूक आयोगाने राज्यातील महापालिकांच्या निवडणुकांसाठी आरक्षित जागांची संख्या निश्चित करणे त्या जागांचे संबंधित प्रभागांमध्ये वाटप करण्याचा आदेश दिला आहे. महापालिकांच्या आरक्षण सोडतीचे वेळापत्रकही आयोगाने जाहीर केले आहे .राज्यातील सर्व महापालिका आयुक्तांना आयोगाचे सचिव सुरेश काका यांनी आदेश दिले आहेत.
30 ऑक्टोबर पासून आरक्षणाशी संबंधित प्रक्रिया सुरू केली जाणार आहे. आरक्षित जागांची संख्या निश्चित करून त्यास राज्य निवडणूक आयोगाची मान्यता घेण्यासाठी प्रस्ताव सादर करण्याचा कालावधी 30 ऑक्टोबर ते नोव्हेंबर असा आहे. आरक्षण सोडतीची जाहीर सूचना 8 नोव्हेंबरला वृत्तपत्रांमध्ये प्रसिद्ध केली जाणार असून 11 नोव्हेंबरला आरक्षणाची सोडत काढली जाणार आहे. आरक्षणाची सोडत काढून सोडतीचा निकाल राज्य निवडणूक आयोगाच्या मान्यतेसाठी सादर केला जाईल . प्रारूप आरक्षण हरकती व सूचना मागवण्यासाठी विविध नमुन्यात प्रसिद्ध करण्याची तारीख 17 नोव्हेंबर आहे तर हरकती व सूचना मागवण्याची अंतिम तारीख 24 नोव्हेंबर आहे .
प्रारूप आरक्षणावर प्राप्त झालेल्या हरकती व सूचनांवर विचार करून महापालिका आयुक्त अंतिम आरक्षणाबाबत 25 नोव्हेंबर ते एक डिसेंबर या कालावधीत निर्णय घेतील .आयोगाच्या मान्यतेनंतर दोन डिसेंबर रोजी अंतिम आरक्षण शासन राजपत्रात प्रसिद्ध केले जाईल असे आयोगाच्या वेळापत्रकामध्ये नमूद करण्यात आले आहे. राज्य निवडणूक आयोगाने 32 जिल्हा परिषदा आणि ३३६ पंचायत समितीच्या मतदार याद्या अंतिम करण्यासाठी मुदतवाढ दिली आहे , तसेच दुबार मतदारांवर कार्यवाही करण्याचे आदेश जिल्हाधिकाऱ्यांना देण्यात आले आहेत.
