पिंपरी चिंचवड पोलीस आयुक्तालय हद्दीतील सराईत 47 गुन्हेगार तडीपार!
पिंपरी : पिंपरी चिंचवड पोलीस आयुक्तालय हद्दीतील चारही परिमंडळांतर्गत जानेवारी 2026 मध्ये एकूण 47 सराईत गुन्हेगारांना तडीपार हद्दपारची कारवाई करण्यात आली आहे. गुन्हेगारांना एमपीडीए कायद्यान्वये एका वर्षासाठी स्थानबद्ध करण्यात आले आहे.
चारही परिमंडळ अंतर्गत खून, खुनाचा प्रयत्न, जबरी चोरी, दरोडेची तयारी, खंडणीसाठी अपहरण, गंभीर दुखापत, महिलांवरील अत्याचार ,बेकायदा शस्त्र बाळगणे आणि तडीपार आदेशाचा भंग अशा गंभीर स्वरूपाच्या गुन्ह्यांमध्ये सक्रिय असलेल्या सराईत गुन्हेगारांविरोधात ही व्यापक प्रतिबंधक कारवाई करण्यात आली आहे. परिमंडळ एक मध्ये दहा, परिमंडळ दोन मध्ये नऊ, परिमंडळ तीन मध्ये 17 तर परिमंडळ 4 मध्ये 11 सराईत गुन्हेगारांना पुणे जिल्हा, पिंपरी चिंचवड शहर व काही प्रकरणात रायगड जिल्ह्यातील हद्दीतून ठराविक कालावधीसाठी तडीपार करण्यात आले आहे.
तडीपार करण्यात आलेले हे गुन्हेगार 20 ते 50 वयोगटातील असून त्यांच्यावर गंभीर स्वरूपाचे अनेक गुन्हे दाखल आहेत अशी माहिती पोलिसांनी दिली आहे. चार परिमंडळात 24 पोलीस ठाणे असून या पोलीस ठाण्याच्या हद्दीतील गुन्हेगारांच्या हालचालींवर पोलिसांचे लक्ष आहे. चाकण उत्तर व उत्तर महाळुंगे एमआयडीसी पोलीस ठाण्याच्या हद्दीत सक्रिय असलेले रणजीत लक्ष्मण येरकर (वय 19, रा. नाणेकरवाडी, ता. खेड) व रामदास मारुती साळुंखे (वय 37, रा. आंबेठाण, ता. खेड) या दोघांवर एमपीडीए कायद्यान्वये कारवाई करण्यात आली असून त्यांना अनुक्रमे येरवडा व नागपूर मध्यवर्ती कारागृहात एका वर्षासाठी स्थानबद्ध करण्यात आले आहे.
